استمرار حتى الاستقرار

[محمد]

استمرار حتى الاستقرار


إيه هدفكم من المظاهرات والوقفات وعروض الفيديو والصور فى الشارع ؟ انتم كده بتهيجوا الشباب .... انتم عاوزين تولعوا البلد ??

احنا عاوزين البلد تستقر ونخلص من الفترة الانتقالية دى ، عاوزين نكشف الحقيقة لاهلنا ، ولما المجلس العسكرى دلوقت يعرف ان الحقيقة ممكن توصل للناس بطرق تانيه غير التلفزيون اللى هو مسيطر على كل حاجة فيه ، واللى بيحاول دايما يغطى على الحقيقة عن طريقه ، ده أكيد هيخليه يفكر كتير قبل ما يضرب ويسحل ويقتل في الناس ، يعنى احنا عايزين نحافظ على دماء المصريين ، مش عاوزين الدنيا تولع .
بس اللى هناك دول بلطجية ومأجورين وعملاء و ....
بلطجية ازاى وكل اللى ماتوا فى الأحداث الأخيرة منهم الشيخ الأزهرى عماد عفت أمين لجنة الفتوى بالأزهر ، ومنهم علاء عبد الهادى من أوائل طلاب كلية الطب ومحمد مصطفى بطل مصر فى التنس ، ومن ضمن المصابين أطباء وطبيبات كانوا بيحاولوا يسعفوا المصابين ، ومنهم فتاه اسمها عزة ضربوها وهى بتحاول تساعد البنت اللى اتسحلت فى الشارع ( وعلى فكرة عزة دى أخوها وأبوها وأعمامها كلهم ضباط جيش ، معقوله كل دول وغيرهم عملاء وخونة ومأجورين ؟؟
طيب كفاية مظاهرات بقى حرام عليكم خربتوا البلد
كل المكاسب اللى اتحققت حتى الآن كانت بسبب الضغط الشعبي والمظاهرات والاعتصامات ، لولا المظاهرات دى ما كنش أصلا مبارك رحل ولا كانت تمت المحاكمات ولا اتحدد معاد للانتخابات ، طبعا هتقوللى طب الخراب بييجى منين ؟ الخراب والدمار أعداء الثورة هما اللى عملوه مش الثوار ، هما اللى فتحوا السجون وخرجوا البلطجية ، وهما اللى أجروهم لتخريب البلد .
بتقولوا المجلس العسكري لازم يمشي .. يمشي يروح فين و يسيب البلد لمين ؟
عايزينه يرجع لدوره الأصلى فى حماية الحدود والحفاظ على امن مصر ، مش ده أحسن ما يورط جنود الجيش في ضرب وقتل اخواتهم في المظاهرات ؟ عايزينه يسلم السلطة لرئيس مدني منتخب من الشعب ، وده عشان يحصل الاستقرار الحقيقي .
ما هو خلاص المجلس العسكري وعد بتسليم السلطة كمان ست شهور ايه لازمة المظاهرات دلوقتي ؟
هو وعد بتسليم السلطة في مدة أقصاها ست شهور ابتداءا من يوم 11/2/2011 يعني اخرنا 11/8/2011 و وعد بانتخابات برلمانية في شهر يونيه و رئاسية في أغسطس السنة اللى فاتت ، وبعدها وعد بتسليم السلطة في موعد أقصاه ستة أشهر من إعلان نتيجة الاستفتاء على التعديلات الدستورية ، ورجع بعدها أعلن عن تسليم السلطة في موعد أقصاه ستة أشهر من صدور الإعلان الدستوري في نهاية مارس .... و في البيان رقم 28 للمجلس العسكري أكد المجلس على انه سينهي تسليم السلطة قبل انتهاء عام 2011 و انه لا صحة لأي إشاعات تتكلم عن أن تسليم السلطة سيؤجل لعام 2012 ،،، ودلوقت فات سنة ولسه بيوعد انه هيسلمها كمان ست شهور ، كل يوم بيمر على المجلس العسكري في السلطة معناه المزيد من افتعال الأزمات و سقوط الشهداء و إخفاء أدلة إدانة فلول النظام السابق و إضاعة أموال مصر المكدسة في بنوك الخارج وعلى فكرة ثورة ليبيا اللى يدوب خلصت من كام أسبوع استردت حتى الآن 197مليار من أموالهم المنهوبة خارج ليبيا ، ومصر اللى بقالها سنة مارجعتش ولا جنيه من فلوسها المتهربة خارج مصر .
بس كده انتم بتعطلوا عجلة الانتاج
مين اللى بيعطل عجلة الإنتاج ؟ اللى بيعمل مظاهرات فى ميدان التحرير يوم جمعة مرة ولا مرتين كل شهر ؟ واللا اللى بيطول فى المرحلة الانتقالية ؟
مافيش اى مستثمر هيرضى يعمل مشروع فى بلد بيحكمه العسكر ، ولا يرضى يحط فلوسه فى بلد بتديرها حكومات انتقالية ، لكن لو عندنا حكومة مدنية منتخبه ومستقرة كل الناس هتتشجع تستثمر عندنا .
جبهة مكملين بالبحيرة
حزب العدل 01094860287 - حزب الغد 01113624539
حركة 6 أبريل 01003376816 - حملة الدكتور البرادعى 01001345267
حملة الدكتور أبو الفتوح 01150252828 - حركة كفاية 0102787825 حزب النهضة 01117554861 حركة وعى 01145166788